SHERIA MPYA,HUWEZI TENA KUKOPEA KIWANJA,SHAMBA AMBALO HALIJAENDELEZWA HATA KAMA UNA HATIMILIKI.

Na Bashir Yakub.

Wiki iliyopita niliandika kuwa ujenzi wa fensi pekee kwenye kiwanja sio maendelezo halisi kwa mujibu wa kanuni mpya za sheria ya ardhi tofauti na tulivyozoea. Leo tena tunatizama Sehemu ya (iii) kanuni ya 7 ya kanuni mpya kanuni za Sheria ya Ardhi kupitia tangazo la serikali  namba 345 la tarehe 26/ 4 / 2019.

Kanuni ya 7(1) inasema kuwa mwenye kiwanja/shamba ambalo halijaendelezwa au lenye maendelezo hafifu,endapo ataomba mkopo na kuweka rehani ardhi hiyo, atatakiwa ndani ya miezi sita tokea siku alipoweka rehani, apeleke taarifa kwa kamishna wa ardhi kuonesha ni  namna gani pesa yote au sehemu ya pesa alizokopa zimetumika katika kuendeleza ardhi husika.

Kutokana na kanuni hii maana yake ni kuwa ardhi unayokopea inatakiwa kuwa imeendelezwa au kama haijaendelezwa basi kiasi cha pesa unachopata kupitia mkopo lazima kitumike kuendeleza ardhi hiyo uliyotumia kukopea bila kujali umekopa hela ili kuzifanyia nini. Na hii ni kwa ardhi zenye hatimiliki. Mwenye ardhi atatakiwa ndani ya miezi sita  tokea kuweka ardhi yake rehani apeleke taarifa maalum kwa kamishna wa ardhi kuonesha ni namna gani hela yote au sehemu ya hela aliyoipata ilivyotumika kuendeleza ardhi aliyoweka rehani.

MFANO, una kiwanja chenye hatimiliki, lakini hakijaendelezwa(un-developed) au kimeendelezwa lakini maendelezo hafifu(under-development) kama kujenga fensi tu, au kijumba kibovu cha mlinzi nk.Sasa unaomba mkopo benki wa Tsh milioni 50 na rehani yako ni kiwanja hicho. Benki wao watatizama na kuona kuwa kiwanja unachoweka rehani hakijaendelezwa au kina maendelezo hafifu.

Watakueleza sharti hili la sheria mpya kuwa aidha ukiendeleze halafu ndio uje kwao kuchukua mkopo au wakipokee hivyohivyo kama rehani lakini kuwe na makubaliano maalum kuwa ndani ya miezi sita kiasi kutoka hiyo milioni 50 wanayokupatia itatumika kuendeleza kiwanja, na wao hilo watalisimamia kuhakikisha linafanikiwa kwakuwa bila kiwanja kuendelezwa mkopo utakuwa batili na wao watapoteza.

Kama utakubali utapata mkopo kama utakataa hautapata mkopo kwasababu bila hivyo mkopo utakuwa batili kwa mujibu wa mabadiliko haya ya sheria. Hivi ndivyo itakavyokuwa.Tafsiri kwa ujumla wake ni kuwa ardhi ambayo haijaendelezwa au ina maendelezo hafifu kama kujenga fensi nk. haiwezi tena kutumika kukopea hata kama ina hatimiliki.

Aidha, kama benki wataamua kukupatia mkopo kwa masharti ya  kuendeleza basi ndani ya miezi sita tokea upokee mkopo huo ni lazima kupelekwa taarifa maalum kwa Kamishna wa ardhi kuonesha ni namna gani mkopo huo umetumika kuendeleza ardhi iliyowekwa rehani, na hii ni hata kama mkopo huo unatoka kwa mafungu(installment).

Pia, hii yote haijalishi unakopa ili hizo hela ukazifanyie nini. Hata kama unataka kununua gari, au kufungua biashara, sharti ni kuwa kiasi cha hela kitoke kuendeleza ardhi. Kazi itabaki kwako umekopa kiasi gani, kiasi gani utumie kuendeleza ardhi, kiasi gani kitabaki kwa ajili ya biashara zako, na kama hilo kwako litawezekana ukarudisha hela ya watu ikiwa salama baada ya kuikata kata hivyo.

Zaidi, taarifa ya namna pesa ilivyotumika kuendeleza eneo itakuwa katika fomu maalum ambayo imeanzishwa na sheria hiyo fomu namba 551.

Mwisho udanganyifu wowote katika mchakato huu ni jinai inayoweza kukupeleka jela kwa kifungo kisichozidi miaka miwili au faini, au vyote viwili kwa mujibu wa kanuni ya 9.

MWANDISHI   WA   MAKALA  HAYA   NI   MWANASHERIA  NA  MWANDISHI  WA MAKALA YA SHERIA KUPITIA GAZETI  LA JAMHURI KILA JUMANNE. ”.   0784482959,  0714047241bashiryakub@ymail.com