KUPATA LESENI YA KUTAFUTA MADINI TANZANIA.

NA  BASHIR  YAKUB - 
1.LESENI  HUTOLEWA  KWA  NAMNA  MBILI.

Unapohitaji  leseni  ya  kutafuta madini  unapaswa  kujua  kuwa  leseni  hizi  hutafutwa  kwa  namna  mbili  tofauti. Kwanza  kwa  maombi  maalum  na  pili  kupitia  zabuni. Sheria  mpya  ya  madini  sheria  namba  14  ya  2010 ndiyo  kiini  cha  makala  haya.

2.LESENI  KWA  MAOMBI  MAALUM.

Kwa  maombi  maalum  ni  hatua  ya  kawaida  ya  kuomba  kama ambavyo  unaweza  kuomba  kazi  au  tenda  yoyote  ambayo haijatangazwa na  serikali. Hatua  hii  huja  baada  ya  mjasiriamali  kuliona  eneo  la  madini   na  kuamini  kuwa  anaweza  kuwa  sehemu  ya  biashara  ya  eneo  hilo.  

Maombi  hufanywa  katika  fomu  maalum  ambazo   hupatikana  kwa  kamishna  wa  madini.  Makamishna  wa  madini  hupatikana  hata  wilayani  au  mikoani  hivyo  inategemea  ni  sehemu  ipi unataka  kutafuta  hayo  madini.

Kubwa  ni  kuwa  utatakiwa  kutumia  wilaya  au  mkoa  husika  katika  kupata  fomu   hiyo  kwa  ajili  ya  kutuma  hayo  maombi.

( a ) ILI  KUPATA  LESENI  SIO  LAZIMA  UMILIKI  KAMPUNI.

Ipo  dhana  inayofifisha  jitihada  za  baadhi  ya  wajasriamali  wenye  ndoto  na  biashara  hii  kwa kudhani  kuwa  leseni  hutolewa  kwa  makampuni  tu,                tena  makampuni  yenyewe  makubwa.  Hii  si  kweli  kwani  hata  mtu  binafsi  anaweza  kuomba  leseni.

Hii  ni  kwa    mujibu  wa  kifungu  cha  28 ( 1 )  cha  sheria  ya  madini.  Kwahiyo  inafaa  sana  kueleweka  kuwa  suala  la  utafutaji  wa  madini  halihusu  makampuni  bali  hata  watu  binafsi   wanaweza  kuomba  leseni  hizo  na  kupata.

( b )  TAARIFA  VIPI  ZINAHITAJIKA  KWA  MTU  BINAFSI  NA  KAMPUNI.

Unapotuma  maombi  ukiwa  kama  mtu  binafsi  utatakiwa  kuainisha  majina  matatu  kamili, uraia  wako,  anuani  ya  posta  ikiwa  ni  pamoja  na  anuani  kamili  ya  makazi, sambamba  na  hilo  iandaliwe  picha  ya  sasa    ya pasipoti.

Na  kama  ni   jina  la  kampuni  kitahitajika cheti  cha  usajili, majina  ya  wakurugenzi  na  uraia  wao.  Pia  kwa  wote  muombaji  binafsi  au  kampuni  atatakiwa  kuanisha  aina  ya  madini  anayoomba   kutafuta,  ikiwa  ni  madini  ya  malighafi  ujenzi,  madini  ya  viwandani, almasi,  madini  chuma  n.k.

3.  LESENI  KWA  ZABUNI.

Maombi  kwa  njia  ya  zabuni  yameainishwa   katika kifungu  cha  29( 1 )  cha  sheria ya  madini. Mchakato   wa  wa  kawaida wa kumtafuta  mzabuni ndio  utakaohusishwa  katika  maombi  haya.

Mamlaka  husika zitatangaza   tenda   na  washindani  watajitokeza  kwa  njia  ya  maombi.  Hapa  maombi  yataandaliwa  kwa  kufuata  utaratibu  wa  jumla  utakaokuwa  umeelekezwa  kwenye  tangazo  la  tenda  hiyo.

Kwa  mujibu  wa  kifungu  hicho  maombi  yatawasilishwa   kwenye  bodi  ya  ushauri  wa  madini.

Bodi  ya  ushauri  wa  madini  ni  chombo  kinachoanzishwa na  kifungu  cha  23 ( 1 )  ambacho  jukumu  lake  kubwa  ni  kumshauri  waziri  mwenye  dhamana  ya  madini  masuala  yanayohusu  madini.

4.  WAJIBU  KWA  ALIYEPATA  LESENI.

( a ) Kwanza  ni kuanza  utafutaji  wa  madini  mapema ndani  ya  miezi  mitatu  tangu  kupata  leseni.

( b ) Kuzingatia  mpango  wa  utafutaji  ulioanishwa  kwenye  leseni,  na

( c ) Utafutaji  usiwe  chini  ya  kiwango kwa  mujibu  wa  leseni  husika.

MWANDISHI  WA   MAKALA  HAYA   NI   MWANASHERIA  NA  MSHAURI WA  SHERIA  KUPITIA  GAZETI  LA  SERIKALI  LA   HABARI   LEO  KILA  JUMANNE  , GAZETI  JAMHURI   KILA  JUMANNE  NA  GAZETI  NIPASHE  KILA  JUMATANO.      0784482959,        0714047241              bashiryakub@ymail.com