Sheria Yakub Blog: HATUA ZA KUFUATA UNAPOHITAJI HATIMILIKI.

NA BASHIR YAKUB -

Hatua unazopitia unapohitaji hatimiliki ni tofauti na hatua unazopitia unapohitaji kubadilisha jina katika hatimiliki( transfer). Kutafuta hati na kubadilisha hati ni michakato miwili tofauti. Makala kadhaa zilizowahi kuandaliwa zilieleza namna ya kubadilsha hati na sio namna ya kutafuta hati mpya. Makala ya leo yanaeleza namna ya kupata hati mpya.

1.TOFAUTI YA KUTAFUTA HATI NA KUBADILISHA HATI.

Unapotafuta hati maana yake ni kuwa ardhi yako haikuwa na hati kabisa na sasa unaanza mwanzo kabisa kutafuta. Kwa wamiliki wa ardhi za namna hii mara nyingi ni zile ardhi zenye mikataba ya kununulia( sale agreement),ardhi zenye barua ya toleo( letter of offer), na nyingine zinakuwa hazina waraka wowote. Kwa ardhi za namna hii unaposema unahitaji hati ni lazima uanze mwanzo kabisa.

Aidha kubadilisha hati maana yake ni kuwa, hati inakuwepo isipokuwa inabadilishwa kutoka jina moja kwenda jingine.

Pengine ni muamala wa mauziano kwahiyo jina linatoka kwa muuzaji kwenda kwa mnunuzi au linatoka kwa marehemu kwenda kwa msimamizi wa mirathi. Kwahiyo kubadilisha ni kubadilisha tu na wala sio kutafuta hati mpya.

2. HATUA ZA KUFUATA UNAPOTAFUTA HATI.

( a ) KUPATA COORDINATE.

Hii ni hatua ya kwanza kabisa. Coordinate ni kama taarifa za kipimo maalum ambacho hufanyika kwenye ardhi ambayo haikuwahi kufanyiwa kipimo hicho. Taarifa za coordinate hupatikana kupitia kipimo kiitwacho GPS. Kinachofanyika ni kuwa mtaalam wa ardhi atafika kwenye ardhi yako na kufanya kipimo cha GPS.

Majibu ya kipimo hicho atayapeleka wizarani au manispaa kwenye “mpango mkuu”( master plan). Master plan ni ramani maalum za maeneo yote . Hivyo kupitia kipimo alichochukua kwenye ardhi yako kitalinganishwa kwenye hiyo ramani ( master plan) na kupata taarifa kamili za ardhi yako.

Hapo kwenye master plan ndipo matumizi ya ardhi zote yalipoainishwa. Kwahiyo jibu litatoka hapo kuwa ardhi yako imepangwa kwa ajili ya matumizi gani. Ikiwa imepangwa kwa ajili ya makazi na wewe unatafuta hati ili ujenge kiwanda utazuiwa.

Na ikiwa unataka kuweka makazi wakati matumizi yanaonesha eneo hilo ni la makaburi au la wazi, au eneo la shule hospitali n.k. pia haitakuwa rahisi kwako kupata hati. Muhimu hapa ni kuwa hatua ya awali ya kipimo cha GPS ndiyo inayotoa mwelekeo wa eneo lako limepangwa kwa ajili ya nini na hivyo upate hati kwa matumizi yako au hapana.

( b ) KUPIMIWA.

Baada ya hatua hiyo itatakiwa eneo lako lipimwe( survey). Wataalam wa kupima wapo wilayani lakini pia wapo watu binafsi wanaofanya kazi hizi za kupima. Hakuna gharama maalum ambayo inaweza kutajwa hapa kwakuwa kupima ni kazi ambayo hutegemea maelewano ya mpimaji na mpimiwaji .

( c ) MANISPAA KUTOA FOMU NAMBA 19.

Baada ya hapo utahitaji kuandaliwa form namba 19 pamoja na barua inayoeleza historia ya kiwanja/eneo husika.

Fomu hii pamoja na barua huandaliwa na manispaa. Na manispaa inayohusika ni ile manispaa lilimo eneo lako. Sambamba na hilo utaandaliwa pia barua ya utambuzi( acknowledgement letter) kwa ajili ya malipo ya ada husika. Katika hatua hii ni lazima uwe na cheti cha kuzaliwa au cha uraia.

( d ) KUANDALIWA RASIMU YA HATI.

Baada ya hayo manispaa itaandaa rasimu ya hati na kuiwasilisha kwa kamishna wa ardhi ambapo ataisaini na kuigonga muhuri wa moto kabla ya kuiwasilisha kwa msajili wa hati. Inapotoka kwa msajili wa hati kwa usajili basi hati inakuwa imekamilika na sasa utaweza kupata hati yako iliyo kamili.
NYUMBA KUBWA INAUZWA.