NDUGU HAWATAKI KUGAWA MIRATHI ILI UPATE CHAKO, NINI UFANYE ?

NA  BASHIR  YAKUB - 

Wako  watu  ambao  hawajui  hatua  za  kuchukua iwapo  ndugu  zao  hawataki   kugawa  mirathi  ili kila  mtu achukue  chake. Unakuta  ndugu  ni  wengi  au wachache na  marehemu  ameacha  mali  kwa  wosia  au  bila  wosia.  Miezi  inakwenda  miaka  inakwenda  waliopewa jukumu  la  kuangalia  mali  hizo  hawataki  kuzigawa  ili  kila  mtu  apate  haki  yake.  Wengine  mpaka  wamekufa  bila  kupata  haki  yao  ya  mirathi   na  kuwaacha  watoto  au  bila  watoto.  Kisheria  nini  ufanye  katika  mazingira  kama  haya.

1.HAKI  YA  KUGAWANA  MIRATHI.

Mtu  anapokufa  na kuacha  mali  iwe  kwa  wosia  au  bila  wosia  kisheria  ni  haki  ya   waliobaki  ambao  ni warithi  halali  kugawana  zile  mali  . Suala  la  kugawana mali  sio  ombi   isipokuwa  ni  haki  ambayo  ni lazima  itekelezwe.  Mara  nyingi  unakuta  yule  aliyepewa  mamlaka  ya  kusimamia  mali  za  marehemu  awe  kaka, dada, baba mkubwa  au mdogo  anakaa  na  zile mali  miezi  na  miezi,  miaka  na  miaka  na  hataki  kusikia  lolote  kutoka  kwa mtu  yoyote  kuhusu   kugawa  mali  na  kila  mtu  kuchukua  chake.

Unakuta  kila  mara  anapoombwa na  mmoja  wa  ndugu  kugawa  zile  mali   anakuwa  mkali    sana,analeta sababu zisizoeleweka,anakwepakwepa   ilimradi   tu watu  wasichukue  chao. Uzoefu  unaonesha kuwa mara  nyingi  mtu  wa  namna  hii  huwa kuna  namna  anavyofaidika   na  zile  mali  wakati  wengine  hawafaidiki  kwa  namna  yoyote. Unaweza  kukuta  labda anakusanya  kodi   au  kama  ni mradi  unazalisha  basi  yeye   ndiye  anayefaidika  na  mapato huku  akiendeshea  maisha yake.  

Hili  si  sawa  kwa  mujibu  wa  sheria  ya  mirathi  sura  ya  352.  Kwa mujibu  wa  sheria  hiyo  mirathi  ni  haki  ya  msingi  kwa wale  wote wanaotakiwa  kufaidika  nayo.  Suala  la  kugawa  mirathi  na  kila  mtu kupata  kilicho  chake  si  la  hiyari  isipokuwa ni  lazima. Labda  iwe  warithi wote  bila  kuacha  hata mmoja wawe hawataki  igawiwe .

2.    SUALA  LA  WINGI WA  NDUGU  WASIOTAKA  MIRATHI  IGAWIWE.

Yawezekana  ndugu  walio  wengi  hawataki  mirathi  igawiwe na  wachache  ndio  wanataka  igawiwe.  Kitu ambacho   tunatakiwa  kuelewa  ni  kuwa   hata  iwe  wengi  ndio  hawataki  igawiwe  hilo  haliondoi  haki  ya  wachache.  Na  hili  hata  mtu  akiwa  mmoja   anataka  igawiwe  na  wengi  ndio  hawataki  bado  haki  yake  inatakiwa  ipatikane. Ikiwa  walio  wengi  hawataki  kugawana  basi  wao  mirathi  yao  wasigawane  ibaki  hivyohivyo   isipokuwa  basi  wamtolee   fungu  lake  huyu  mmoja aende  zake.  Kitu  ambacho  hakipo  kwenye  sheria na  ambacho  kinatokea  katika  familia  nyingi  ni  ile  tabia  ya  walio  wengi  kusema  sisi  wengi  tumeamua  hivi  na  hivyo  maamuzi  ya  wengi  ndiyo yanayosimama.  Lazima  tujue  kuwa  suala  la  mirathi  halitekelezwi  kwa  upigaji   kura  kama  ilivyo katika  siasa  kwa mtindo  wa  wengi  ndio  washindi (super majority/simple majority).

Suala  la  mirathi  ni  suala  linalozaliwa  na  haki  na  haki  haina  wingi. Yawezekana  ndugu   wakawa  hata  arobaini  lakini  kwakuwa  ni  suala  la  haki   ndugu  mmoja  tu  akatakiwa  kutekekelezewa  kile  anachotaka.Kwa ufupi  hapa  hakuna  wingi  , hakuna  ukubwa,  hakuna  ukaka  wala  udada  isipokuwa   kila  mrithi  mdogo  au   mkubwa  , tajiri  au  maskini  anatakiwa  kupata  fungu lake  iwapo  atalihitaji.

3. NINI  UFANYE  IWAPO  NDUGU  WAMEKATAA  KUGAWA MIRATHI  ILI  UPATE  CHAKO.

Ikiwa  ndugu  wamekataa  kukumegea  fungu  lako  ili  uendelee  na  maisha  yako  tena  bila  sababu  za  msingi  basi  una  haki  kufungua  shauri  mahakamani  kuwaita  na  kuwauliza kwanini  mahakama  isiwachukulie  hatua  kwa  kukataa  makusudi  kutoa  haki  yako  ya  kisheria. Ikiwa hawatatoa  sababu  za  msingi  basi  mahakama  itaagiza  kufanyika mgao    na  itatoa  muda  kwa hilo. Hii  ni  namna  ya pekee  ya  kuwashinikiza  watu  wa  namna  hii  kutoa haki  za  warithi.

Aidha  yafaa  tuelewe  kuwa  baadhi  ya  migogoro  mikubwa  ya  mirathi  ambayo  imekuwa   ikizikumba  familia nyingi  inatokana  na  tatizo  hili  la  kutogawana  mirathi kwa  wakati.  Mtu  anakufa  anawaacha  warithi,   warithi  nao  wanaanza kufa  mmoja mmoja wanawaacha  warithi  wengine. Matokeo  yake  warithi  wa  kwanza ambao  hawajafa  na  warithi  wanaozaliwa  na  warithi  waliokufa  wanashindwa  kuelewana  kuhusu  nani  anastahili  kupata  nini. Hawa  wanasema  tunahitaji  fungu  la  mama  yetu  au  baba  yetu  aliloachiwa  na  wazazi  wake  na  hawa  wanasema  wajukuu  huwa  hawarithi. Mgogoro  unakuwa  mkubwa  bila  sababu wakati  kila  mtu  angepata  chake  mapema  na  kwa  wakati  hayo  yote  yasingetokea.

MWANDISHI   WA   MAKALA  HAYA   NI   MWANASHERIA  NA  MSHAURI   WA  SHERIA  KUPITIA  GAZETI  LA  SERIKALI   LA   HABARI   LEO  KILA  JUMANNE  , GAZETI  JAMHURI   KILA  JUMANNE  NA  GAZETI  NIPASHE  KILA  JUMATANO.    0784482959,        0714047241              bashiryakub@ymail.com

                                           TANGAZO   MUHIMU                                                

VIWANJA     NA     NYUMBA          ZINAUZWA.

·        
WANASHERIA   WETU   WATAKUANDALIA   MIKATABA  YOTE  BURE  NA    KUKUSIMAMIA  MPAKA   MANUNUZI    YAKAMILIKE   BURE.

·        
UHALALI   WA  NYARAKA   NA   UMILIKI   UMETHIBITISHWA  NA                        WANASHERIA  WETU.

·        
UTAPEWA  MTU  WA  KUKUSAIDIA  KUFANYA  TRANSFER   KWA  HARAKA         BURE.

·        
IKIWA   UTATOKEA   MGOGORO  NDANI   YA  MWAKA  TANGU  TAREHE  YA       MANUNUZI    UTAPEWA   WAKILI   WA   KUSIMAMIA  MGOGORO    BURE

                                                        0784482959.

 KUONA   BOFYA  HAPO  JUU    MWANZO  WA   BLOG.