KAMA HAMUELEWANI JUU YA MSIMAMIZI MIRATHI INARUHUSIWA NYOTE KUOMBA KUSIMAMIA MIRATHI.

NA  BASHIR  YAKUB - 

Mara  kadhaa kwenye  familia  mbalimbali   kumekuwa hakuna  maelewano  juu  ya  nani  asimamie  mirathi. Unakuta  wapo  wanaomkubali  fulani  asimamie  na  wapo  wanomkataa  wakimtaka   fulani  mwingine  ndiye  asimamie.  Hii   huwa  na  athari  kubwa sana  kwa  warithi  hasa  watoto  kama  wanasoma  ambao  kimsingi  hutakiwa kutumia mali  zile katika  mahitaji  ya  msingi  kama  ada  na  mahitaji  mengine muhimu ya  kiustawi. Tumeshashuhudia  mara  nyingi  watoto  wakiacha  kwenda  shule  kwa  kukosa ada  na  mahitaji  mengine  muhimu  kwa  ustawi  wao sababu  kubwa  ikiwa  mgogoro  wa  nani  awe  msimamizi  mirathi. Naamini  huwa hakuna sababu  za  msingi  za kufikia   huko kwakuwa  tayari  sheria imetoa  mwongozo  wa  nini  kifanyike  katika  mazingira kama  hayo.  Utata  huu  mara  nyingi  husababishwa  na  kutokuaminiana  hasa  kama  ndugu  wana  utofauti  wa  mmoja wa wazazi  mama  au  baba. Makala  yataeleza lipi  la  kufanya.

1.MAMBO  YANAYOZINGATIWA  NA  MAHAKAMA  KUTEUA MSIMAMIZI  MIRATHI.

( a ) Kwanza  mahakama  huangalia  kama kuna  wosia.  Iwapo  kuna  wosia  basi  huangalia  iwapo  wosia  ule  umemtaja  msimamizi  wa  mirathi. Ikiwa  umemtaja   msimamizi  wa  mirathi    na  hakuna  shauri  lolote  lililofunguliwa kupinga  au  kuhoji  uhalali  wa  wosia  huo   basi  msimamizi  wa  mirathi  aliyetajwa  ndani  ya  wosia  huo ndiye  atakayethibitishwa  rasmi na  mahakama    kama  msimamizi  halali  wa  mirathi.

( b ) Uadilifu  wa  mwombaji  ni  jambo  jingine  muhimu  linalozingatiwa  sana  na mahakama   kabla  kumteua  msimamizi  wa  mirathi. Yawezekana  mtu  akawa   ni  ndugu  wa  karibu  na  wa  pekee  wa  marehemu   aliyebaki    lakini  si  mtu  muadilifu. Ni mtu  ambaye  kukabidhiwa  amana  kubwa  ya  mirathi  ambayo  hukusanya  magari ,majumba  , mashamba   viwanja  n.k  itakuwa ni  sawa  na  kuzitupa  mali  hizo.  Lakini  pia  uadilifu  asiwe  ni  mtu  ambaye   ana  upendeleo  kiasi  akikabidhiwa  mirathi hawezi  kutenda  haki   baina  ya  warithi.  Watu  wenye  sifa  hizo  hawatateuliwa  kusimamia  mirathi. Hata  hivyo hayo  yatatakiwa kuibuliwa  na  kuoneshwa  na  wanaompinga  msimamizi  aliyependekezwa  kwa kupeleka  pingamizi  mahakamani.

( c )  Jingine  linaloangaliwa  ni  maslahi  ya  muombaji  kwa  marehemu  au  kwa  mali  za  marehemu.  Maslahi  kwa  marehemu huangaliwa  ukaribu  wa  udugu  kwa  mfano  huyu ni  mjomba  wa  marehemu  na huyu  ni  mtoto  wa  marehemu. Kimsingi  mtoto  wa  marehemu atakuwa  na  nafasi  kubwa  ya  kuwa  msimamizi  wa  mirathi kuliko  mjomba  wa  marehemu.  Aidha maslahi  kwa  mali  za  marehemu  huhusisha  wadeni  wanaomdai  marehemu  kwa  mfano  mabenki n.k. Hawa  nao  wanaweza  kuomba na  kukubaliwa  kuwa  wasimamizi  wa  mirathi.

2. KAMA  HAMUELEWANI  JUU  YA  MSIMAMIZI  MIRATHI  INARUHUSIWA  NYOTE   KUOMBA  KUSIMAMIA  MIRATHI.

Ikiwa  kama  wanafamilia  mmeshindwa  kuelewana  kuhusu  nani  awe msimamizi  wa  mirathi au  baadhi  wamemteua  msimamizi  wa  mirathi   na  baadhi  hawakuridhika  naye  basi  inaruhusiwa   kwa  wale  ambao  hawakuridhika  nao  kuomba  kuwa  wasimamizi  wa  mirathi  au  kumpendekeza  msimamizi  wao  wa  mirathi.  Yeyote  ambaye  anahisi  haikuwa  sawa  kumteua  fulani  kusimamia  mirathi   badala  ya  fulani  basi  anaweza  naye   kuomba  huyo fulani  wake  naye  awe msimamizi  wa  mirathi.  Hakuna haja  ya  kugombana  ukiona  wamelazimisha  msimamizi  wao  wa  mirathi  basi  na  nyie  teua  wa kwenu na  peleka  jina  lake  mahakamani.

Huko  mahakama  kwa  amani  kabisa  itateua  yule  anayefaa  zaidi  kati  ya  hao  wawili, watatu  au wanne.  Hii  ni kutokana  na  kifungu  cha  33( 2 )  cha  Sheria  ya  Mirathi  sura  ya 352 ambacho  kinasema  kuwa  ikiwa   watu  zaidi  ya  mmoja   wataomba  kuteuliwa  kuwa  wasimamizi  wa  mirathi   basi  itakuwa  ni  katika  uhuru  wa  mahakama( court  discretion)  kuamua  nani  kati  ya  hao  awe  msimamizi  wa  mirathi  huku   maslahi  ya   mapana  na  mafupi  ya  kila  upande  yakizingatiwa. Wakati  mwingine  mahakama  yaweza  kuteua  msimamizi  wa  mirathi  zaidi    ya mmoja .  Si  lazima  msimamizi  wa  mirathi  awe  mmoja  wanaweza  kuwa  wawili,  watatu  kadiri  mahakama  itakavyoona  inafaa  na  kupendeza.

Yote  kwa  yote kubwa  ninalotaka  watu  kuelewa  ni  kuwa  hakuna  haja  ya  kugombana  kwakuwa  wamemteua  msimamizi  wa  mirathi  usiyemtaka. Ukiona  wamefanya  hivyo  basi  na  wewe  pendeleza  wa  kwako  na  peleka  jina  lake  mahakamani  kuomba    naye kuteuliwa  kuwa  msimamizi  mirathi. Mahakama  itaamua  kati  ya  huyo  wa  kwao  na  huyu  wa  kwako  nani  asimamie  mirathi.  Au  ikiona  wote  wanafaa  basi  wote  wanaweza  kuteuliwa .

MWANDISHI   WA   MAKALA  HAYA   NI   MWANASHERIA  NA  MSHAURI   WA  SHERIA  KUPITIA  GAZETI  LA  SERIKALI   LA   HABARI   LEO  KILA  JUMANNE  , GAZETI  JAMHURI   KILA  JUMANNE  NA  GAZETI  NIPASHE  KILA  JUMATANO.    0784482959,        0714047241              bashiryakub@ymail.com

                                           TANGAZO   MUHIMU                                                

VIWANJA     NA     NYUMBA          ZINAUZWA.

·        
WANASHERIA   WETU   WATAKUANDALIA   MIKATABA  YOTE  BURE  NA    KUKUSIMAMIA  MPAKA   MANUNUZI    YAKAMILIKE   BURE.

·        
UHALALI   WA  NYARAKA   NA   UMILIKI   UMETHIBITISHWA  NA                        WANASHERIA  WETU.

·        
UTAPEWA  MTU  WA  KUKUSAIDIA  KUFANYA  TRANSFER   KWA  HARAKA         BURE.

·        
IKIWA   UTATOKEA   MGOGORO  NDANI   YA  MWAKA  TANGU  TAREHE  YA       MANUNUZI    UTAPEWA   WAKILI   WA   KUSIMAMIA  MGOGORO    BURE

                                                        0784482959.

 KUONA   BOFYA  HAPO  JUU    MWANZO  WA   BLOG.